RËNDËSIA E AKTIVITETIT FIZIK GJATË PANDEMISË COVID-19
Nga: Silvana Delia
Pandemia COVID-19 ka prishur pothuajse çdo aspekt të jetës së zakonshme, edhe rutinat e kryerjes së aktivitetit fizik nuk janë të përjashtuara nga ky çrregullim. Mënyra e të punuarit nga shtëpia, mësimi në distancë, kufizime të kapacitetit publik për palestrat dhe ambientet e fitnesit, protokolle pastrimi, mbajtje maske dhe distancim shoqëror madje edhe në ambiente të hapura, ka ndryshuar mënyrën, si dhe kur mund të ushtrohemi.
Megjithëse mund të jetë joshëse të anashkalohet aktiviteti fizik gjatë këtyre kohërave sfiduese, specialistët e shëndetit publik thonë se stërvitja – megjithëse pa dyshim e rëndësishme në rrethana normale – është thelbësore për shëndetin tuaj fizik dhe mirëqenien mendore gjatë pandemisë COVID-19.
Shumë njerëz po përballen me frikën, ankthin, stresin, shqetësimet financiare, trishtimin, mërzinë dhe izolimin – të gjitha këto mund të kenë një efekt negativ në dietën, shëndetin fizik dhe mirëqenien mendore.
Por si mund të na ndihmojë aktiviteti fizik në përballjen me pandeminë?
Ruajtja e niveleve të aktivitetit fizik është thelbësore për të zbutur ndikimin psikologjik të pandemisë, pasi sedentarizimi ka një efekt të dëmshëm të njohur në funksionin kardiovaskular. Në funksion të bllokimit aktual, është bërë e nevojshme të modifikohen dhe përshtaten programet e rregullta të ushtrimit fizik nga ambjentet e jashtme në ato të shtëpisë, duke përfituar nga hapësira dhe mjetet e disponueshme. Sidoqoftë, ka ende dyshime mbi karakteristikat më të përshtatshme të ushtrimeve që mund të kryeni, të tilla si: lloji, frekuenca, kohëzgjatja, vëllimi dhe intensiteti. Për këtë duhet patjetër të konsultoheni me specialistë të fushës, para fillimit të një programi stërvitor.
Ushtrimet e rregullta janë thelbësore për të gjithë në rrethana normale jetese. Sidoqoftë, gjatë pandemisë COVID-19 është veçanërisht e rëndësishme të kemi në qëndër të vëmëndjes se:
• Aktiviteti fizik rrit sistemin imunitar: Hulumtimet tregojnë se ushtrimet e rregullta me intensitet të moderuar kanë përfitime që rrisin imunitetin dhe mund të ndihmojnë trupin tuaj të luftojë infeksionet, përfshirë COVID-19.
• Aktiviteti fizik mund të parandalojë shtimin në peshë: Ushtrimi mund t’ju ndihmojë të digjni kalori shtesë të shkaktuara nga ndryshimet në dietë dhe të kompensojë efektet e aktiviteteve ulur.
• Aktiviteti fizik zvogëlon stresin dhe ankthin: Ushtrimi është një nxitës i humorit dhe mund t’i ndihmojë të rriturit të ulin nivelin e stresit apo të ndërtojnë qëndrueshmëri emocionale.
• Aktiviteti fizik përmirëson gjumin: Ka prova që sugjerojnë se stërvitja e rregullt ju ndihmon të bini në gjumë më shpejt dhe përmirëson cilësinë e gjumit – dhe përjetimi i një gjumi të mirë gjithashtu është zbuluar se rrit sistemin tuaj imunitar.
Aktiviteti fizik mund të jetë veçanërisht i dobishëm për të rriturit e moshuar dhe njerëzit me sëmundje kronike, të tilla si diabeti, artriti ose sëmundje të zemrës, tensioni i lartë etj. Ushtrimet e rregullta mund të ndihmojnë për të përmirësuar ekuilibrin, përkulshmërinë, forcën, shkathtësinë dhe shëndetin kardiovaskular, si edhe mund të rrisë energjinë pozitive si edhe mirëqenien e përgjithshme.
Burimet e informacionit
World Health Organization. Statement on the second meeting of the International Health regulations (2005) Emergency Committee regarding the outbreak of novel coronavirus (2019-nCoV). E disponueshme në: https://www.who.int/news-room/detail/30-01-2020-statement-on-the-second-meeting-of-the-international-health-regulations-(2005)-emergency-committee-regarding-the-outbreak-of-novel-coronavirus-(2019-ncov) .
Exercise is Essential for Well-Being during COVID-19 Pandemic. E disponueshme në: https://www.nuvancehealth.org/coronavirus/exercise-is-essential-for-well-being-during-covid-19-pandemic/