AKTIVITETI FIZIK, INDIKATOR THELBËSOR PËR MIRËQENIE PSIKOLOGJIKE

Nga: Kelli Delia

Jetojmë në një botë ku, çdo ditë po luftohet me virusin Covid-19. Ndonëse më parë, mendonim se ishte larg nesh, tanimë po ndjejmë efektet e tij, e për pasojë çdo gjë që ne lexojmë, dëgjojmë, shikojmë përpunohet duke na dhënë përgjigje emotive. Nëse i vendosim në një peshore, do të vëmë re se këtë vit, përgjigjet emotive kanë peshuar më tepër në anën negative, që do të thotë se secili prej nesh ka ndjerë më tepër frikë, stres, trishtim, lodhje, ankth, demotivim, humbje të oreksit, gjumit. Duke ju referuar dhe situatës në të cilën ndodhemi, mund të themi se këto ndjenja janë normale, por nëse vijojnë për një kohë të gjatë mund të bëhen shqetësuese dhe të pengojnë individin që të kryejë rutinën e tij. Për pasojë lind nevoja e shkarkimit të kësaj energjie negative që na ka bllokuar mendjen dhe trupin tonë. Si mundet që secili nga ne të ndihet mirë me veten dhe të përballojë çdo situatë? A mundet që këto ndjenja negative, ti zëvendësojmë me ato pozitive? Sigurisht që po, për sa kohë ne ndryshojmë mënyrën e qëndrimit përballë aktivitetit fizik. Shumë prej nesh mund të justifikohen se nuk kanë kohë mjaftueshëm për tu ushtruar, disa të tjerë për koston e kështu me rradhë, por është fare e thjeshtë, sepse e mira e aktivitetit fizik është se ka alternativa nga më të ndryshmet dhe gjithmonë gjendet një aktivitet që i përshtatet secilit.

Ndoshta njerëzimi tani po e kupton më shumë se kurrë rëndësinë që ka lëvizja, aktiviteti fizik në jetën e përditëshme.

Studimet kanë treguar se aktiviteti fizik i rregullt ndikon në përmirësimin e një sërë parametrash të shëndetit psiko-fizik në tërësi, duke mos dashur të lëmë pas dore ndikimin që ka ky produkt ( aktivitet fizik dhe sport) në zhvillimin e të gjithë shoqërisë. Në situatën në të cilën ndodhemi, le të shfrytëzojmë këtë potencial që ka aktiviteti fizik për rritjen e optimizmit, reduktimin e stresit dhe të ankthit.

Një studim tjetër i kërkoi një grupi njerëzish të vlerësonin gjendjen e tyre të humorit menjëherë pas periudhave të aktivitetit fizik (p.sh duke shkuar për një shëtitje ose duke bërë punë shtëpie) dhe periudhave të pasivitetit (p.sh. të parit television apo “lundrimi” në Facebook, instagram etj, per një kohë të konsiderueshme). Studiuesit zbuluan se pjesëmarrësit ndiheshin më të kënaqur, më të lehtësuar, më të qetë pasi ishin fizikisht aktiv krahasuar me pas periudhave të pasivitetit. 

Dr. John J. Ratey, Profesor i i Psikiatrisë në Shkollën Mjekësore të Harvardit dhe ekspert i neuropsikiatrisë me anë të përdorimit të dy medikamenteve tregon këtë  barazim:
 
PROZAC    +    RITALIN    =  USHTRIME FIZIKE
( anti depresant)    (reduktues dhimbjesh) 

Le të eleminojmë mjekimet, kur ka një kurë natyrale si aktiviteti fizik. Filloni me hapa të vegjël duke vendosur objektiva dhe duke menaxhuar kohën në mënyrë sa më produktive. 
Vetja është prioriteti juaj, kështu që kujdesuni për mendjen, shpirtin dhe trupin tuaj!

Në ditët e sotme le të ushtrohemi në kushte shtëpie. Kështu ndihmojmë veten, të afërmit tanë, fëmijët (duke u ushtruar së bashku) duke ndikuar jo vetëm në pëmirësimin e cilësisë së jetës, krijimin e një atmosphere positive, por edhe duke edukuar dhe gjithëpërfshirë me anë të shembullit pozitiv drejt një kulture fizike si stil jetese në përditshmërinë tonë.